ब्रिटनच्या महाराणी एलिझाबेथ यांच्या अंत्यसंस्काराला राष्ट्रपती द्रौपदी मुर्मू हजेरी लावणार

नवी दिल्ली | राष्ट्रपती द्रौपदी मुर्मू आजपासून दोन दिवसीय ब्रिटन दौऱ्यावर आहेत. राष्ट्रपती ब्रिटनच्या महाराणी एलिझाबेथ द्वितीय यांच्या अंत्यसंस्काराला उपस्थित राहणार आहेत. राष्ट्रपती द्रौपदी मुर्मू लंडन दौरा करणार आहेत. महाराणी एलिझाबेथ द्वितीय यांच्यावर सोमवारी 19 सप्टेंबर रोजी अंत्यसंस्कार पार पडणार आहेत. महाराणीचं पार्थिव बकिंगहॅम पॅलेसमध्ये ठेवण्यात आलं आहे.

ब्रिटनच्या महाराणी एलिझाबेथ द्वितीय यांचं गुरुवारी 8 सप्टेंबर रोजी निधन झालं. त्यानंतर मंगळवारी त्यांचं पार्थिव इंग्लंडमध्ये दाखल झालं. त्यांच्यावर 19 सप्टेंबर रोजी अंत्यसंस्कार करण्यात येणार आहेत. त्यांचं पार्थिव लंडनमधील विंडसर येथील किंग जॉर्ज चतुर्थ मेमोरियल चॅपलमध्ये दफन करण्यात येईल. महाराणी एलिझाबेथ द्वितीय यांच्या शासकीय अंत्यसंस्कारात सहभागी होण्यासाठी राष्ट्रपती द्रौपदी मुर्मू देखील लंडनला जाणार आहेत. भारत सरकारच्या वतीने शोक व्यक्त करण्यासाठी राष्ट्रपती द्रौपदी मुर्मू 17 ते 19 सप्टेंबर 2022 रोजी लंडनमध्ये असतील.

परराष्ट्र मंत्रालयाने जारी केलेल्या निवेदनात म्हटले आहे की, ब्रिटनच्या महाराणी एलिझाबेथ द्वितीय यांच्या 70 वर्षांच्या कारकिर्दीत भारत आणि ब्रिटनमधील संबंध अधिक विकसित आणि घनिष्ट झाले आहेत. त्यांनी जगभरातील लाखो लोकांसाठी महत्त्वाची भूमिका बजावली. महाराणी एलिझाबेथ यांचं 8 सप्टेंबर रोजी वयाच्या 96 व्या वर्षी निधन झालं, त्यानंतर आता 19 सप्टेंबर रोजी त्यांच्यावर शासकीय सन्मानाने अंत्यसंस्कार करण्यात येणार आहेत.