उपमुख्यमंत्री देवेंद्र फडणवीस यांच्या नागपूरस्थित घरापुढे बॉम्ब ठेवल्याच्या धमकीचा फोन पोलिसांना आला या आलेल्या फोननंतर संपूर्ण नागपूर पोलीस यंत्रणा अलर्ट झाली होती. मध्यरात्री आलेल्या या कॉलने पोलिस यंत्रणेत एकच खळबळ उडाली. पोलिसांनी तत्काळ फडणवीस यांच्या घराच्या आसपासच्या परिसराची कसून पाहणी केली असता असे काही आढळून आले नाही. या प्रकरणी पोलिसांनी एकास ताब्यात घेतले आहे.
माहितीनुसार, नागपूर पोलिसांच्या कंट्रोल रुमला मध्यरात्री २च्या सुमारास एक कॉल आला व त्यात एका व्यक्तीने देवेंद्र फडणवीस यांच्या घरापुढे बॉम्ब ठेवल्याचे सांगत धमकी दिली. त्यानंतर हा फोन कट झाला. यानंतर फडणवीस यांच्या घरी बॉम्ब शोधक पथक पाठवण्यात आले व पोलिसांचा मोठा फौजफाटा तैनात करण्यात आला.
तसेच पोलिसांनी फडणवीस यांच्या घराजवळील परिसराची पूर्णपणे तपासणी केली. यावेळी संशयास्पद अशी कुठलीही वस्तू आढळून आली नाही. पोलिसांनी ज्या परिसरातून हा फोन आला त्याची चौकशी केली. सदर व्यक्तीला पोलिसांनी ताब्यात घेतलं आहे. फोन करणारा व्यक्ती हा कन्हान भागातील राहणारा असून घरची वीज गेली म्हणून रागात बॉम्ब ठेवल्याचा फोन त्याने केला, अशी प्राथमिक माहिती पोलिसांनी दिली आहे.
