झारखंडमधील जमशेदपूर मधून एक मोठी बातमी समोर येत आहे. बँक ऑफ इंडियामध्ये कर्ज वितरणासंदर्भात मोठा घोटाळा उघडकीस आला असून बँकेच्याच दोन शाखा व्यवस्थापकांनी हा प्रकार केल्याचे समोर आले आहे. दोन डझनहून अधिक लोकांना आणि कंपन्यांना कर्ज देण्याच्या नावाखाली या दोन व्यवस्थापकांनी ९.२४ कोटी रुपयांचा घोटाळा केला. या घटनेमुळे बँकिंग क्षेत्रात एकचं खळबळ उडाली आहे.
तपासात हा घोटाळा उघडकीस आल्यानंतर बँक ऑफ इंडियाच्या बिस्तुपूर शाखेच्या वरिष्ठ व्यवस्थापकाने दोन्ही आरोपी अधिकाऱ्यांसह २७ जण आणि कंपन्यांविरुद्ध एफआयआर दाखल केला आहे. या घोटाळ्याचा आरोप असलेल्या दोन शाखा व्यवस्थापकांमध्ये जमशेदपूर येथील कदम उल्यान शाखेत कार्यरत असलेले धीरज कुमार झा आणि धालभूमधर येथील गोहरडंगरा शाखेचे व्यवस्थापक नितेश यांचा समावेश आहे.
एका वृत्तसंकेतस्थळानुसार बँकेच्या रांची येथील दक्षता पथकाने मार्च महिन्यात कदम उल्यान येथील शाखेची तपासणी केली होती ज्यामध्ये हा घोटाळा उघडकीस आला. त्यानंतर तपासात बनावट कर्जाच्या आधारे एकूण ९.२४ कोटी रुपये काढण्यात आल्याचे समोर आले. दोन्ही शाखा व्यवस्थापकांनी ग्राहक व कंपन्यांच्या नावे बनावट कागदपत्रे तयार करून त्यांच्या नावे कर्ज मंजूर करून रक्कम वेगवेगळ्या खात्यांमध्ये वर्ग केली.
हा बनावट कर्ज घोटाळा २०२० मध्येच सुरू झाला आणि मार्च २०२३ पर्यंत ही प्रक्रिया सुरू राहिली. काहींच्या नावे १० तर काहींच्या नावे पन्नास लाखांपर्यंतच्या बनावट कर्जाची रक्कम वर्ग करण्यात आली असून हे कर्ज कोणाच्या नावावर मंजूर झाले याचा सुगावाही लागला नसल्याचे सांगण्यात येत आहे. बँकेने दाखल केलेल्या एफआयआरमध्ये त्या सर्व २७ लोकांना आणि कंपन्यांनाही आरोपी करण्यात आले आहे ज्यांच्या नावे कर्जाची रक्कम काढण्यात आली आहे.
