गणेशोत्सवाच्या निमित्ताने मुंबई दौऱ्यावर येत असलेले केंद्रीय गृहमंत्री आणि भाजपचे नेते अमित शाह हे मनसे अध्यक्ष राज ठाकरे यांची भेट घेण्याची शक्यता आहे. सदर भेट आगामी मुंबई महापालिका निवडणुकीच्या दृष्टीने महत्त्वाची ठरणार आहे. ही भेट झाल्यास भाजप आणि शिंदे गटासह मनसेदेखील एकत्र येईल. ही युती शिवसेनेला अडचणीची ठरू शकते.
केंद्रीय गृहमंत्री अमित शाह ५ सप्टेंबर रोजी मुंबई दौऱ्यावर येणार आहेत. भाजपचे राष्ट्रीय अध्यक्ष झाल्यानंतर अमित शाह हे लालबागचा राजा गणेशोत्वाला भेट देतात. मागील दोन वर्षांपासून कोरोनामुळे शाह यांनी हा दौरा टाळला होता. त्यानंतर यंदा अमित शाह यंदा मुंबई दौऱ्यावर येणार आहेत.
अमित शाह हे आपल्या मुंबई दौऱ्यात भाजपचे मुंबई अध्यक्ष आशिष शेलार यांच्यासह मुख्यमंत्री एकनाथ शिंदे, उपमुख्यमंत्री देवेंद्र फडणवीस यांचीदेखील भेट घेणार आहेत. शिवसेनेत झालेले अभूतपूर्व बंड आणि आगामी मुंबई महापालिका निवडणुकीच्या पार्श्वभूमीवर अमित शाह यांचा हा दौरा महत्त्वाचा समजला जात आहे.
अमित शाह आपल्या दौऱ्यात उपमुख्यमंत्री देवेंद्र फडणवीस यांचे शासकीय निवासस्थान ‘सागर’ बंगल्यावर भाजप पदाधिकाऱ्यांना मुंबई महापालिका निवडणुकीच्या अनुषंगाने मार्गदर्शन करणार आहेत. यावेळी मुंबई भाजप अध्यक्ष आशिष शेलार यांच्यासह इतर महत्त्वाचे पदाधिकारी, मुंबईतील आमदार उपस्थित राहण्याची शक्यता आहे.
